Nʋa' kpʋn boonyɔ‑
('Dʋ 53)
14
Dafi 'a tɔ' "kpei naa ‑tɩ ‑ɛ ‑nɩa 'de blei klaa" 'a 'dʋsbɛ 'di ɛ.
Nyʋ ‑sea' tɔ' 'di 'na: Kea se nɩ 'de ʋʋ pɛe o.
Ʋʋ ‑wee'‑ ‑sɔɔn' "jɛi, dɛsaʋn 'a 'sʋ ‑ji" ʋʋpʋ‑.
"Isrɛi due' se 'e ʋʋ "klu nɩ mɔɔ' ‑cɛ".
2 Tʋ "bo nɩɛ 'e jaʋn 'di ɛɛ jea nyʋ "kpei ‑gbʋʋn'
‑wɛe ‑bo tɔ' 'di nɩ i jrɔ' ɔ sea Kea ‑pɔn ɛ 'de ɛ 'jeɔ 'je.
3 Ʋʋ ‑wee'‑ "klein" siɛ 'kwla, ʋʋ ‑wee'‑ 'a kplɩn ‑sɔɔn',
'dɔe nʋɩ jrɔ' se 'e ʋʋ "klu nɩ‑,
nyɔ due' koun ‑gbai' mɔɔ' ‑cɛ" se 'e nɩ‑.
4 'De Tʋ "bo 'naa: Nyʋ ‑ʋʋa nʋa dɩsaɩn ‑nɩ 'ee,
"jru se ʋʋpʋ‑ "i nɩ ‑a ‑e? Ʋʋa ‑sɔan' 'ma 'cɛ 'mɛ,
ka nyɔ ɔ dia diiɛ, ʋʋa' po 'ʋn baewlu mɔɔ' ‑cɛ" o.
5 Faʋn a muɛ ʋʋpʋ‑ 'ʋn 'kpaa,
dɛ ‑nʋɛ ɛmɛ ‑nɩ Kea ke "isrɛʋn a na'.
6 ‑Wɛe nyɔ ‑ɔ tba Kea tɔi" ɛ, aoa wlɔɔ,
aoa 'dbɔɔ ‑tɩn' "i, 'kaa Tʋ "bo ‑ble ɔɔ' ‑gba.
7 Ɛ se ɔ mɔ ‑je Selisalɛmʋ 'wlʋ
la ‑wɛe ‑ɔ ‑je Israɛ ‑seie?
‑Sɔntɩ Tʋ "bo a mua ɛɛ' 'cɛ 'de ʋʋ ‑kɔ o dejaa' a,
Sakɔbʋ a muɛ blaa' ɔ 'je dee‑.
Israɛ a muɛ 'mʋa‑ nʋa'.